युलिप्समधील गुंतवणूक एकदम काढता येत नाही!

म्युच्युअल फंडात गुंतविण्यात आलेले पैसे जसे कधीही काढता येतात तसे युलिप्समधील गुंतवणूक कोणत्याही वेळी काढून घेता येत नाही, असे मत काही गुंतवणूकदार तज्ज्ञांनी व्यक्त केले आहे. 

कारण युलिप्सच्या पहिल्या काही प्रीमियममधून सुमारे ६० ते ८० टक्के रक्कम एजंटचे कमिशन म्हणून कापली जाते. त्यामुळे शेअर बाजारात मोठ्या प्रमाणात घसरण झाली तर गुंतवणूकदारांना होणाऱ्या नुकसान भरून काढण्यासाठी दीर्घकाळ लागतो. म्हणजेच तुम्हाला युलिप्समधील गुंतवणूक दीर्घकाळासाठी करावी लागते. अशा गुंतवणुकीत बाहेर पडण्याची प्रक्रिया काही प्रमाणात गुंतागुंतीची असते. 

सटिर्फाइड फिनॅन्शियल प्लॅनर सजग संघवी यांच्या मते युलिप्समधील गुंतवणूक १० ते १५ वषेर् मुदतीसाठी केली तरच ती फायद्याची ठरते. अन्यथा ती जोखीमीची बनते. कारण शेअर बाजारातील चढउतारामुळे या गुंतवणुकीवर लाभ मिळत नाही. 

युलिप्स योजनेत गुंतवणूक करण्यात आलेल्या रकमेतील काही भाग विमा योजनेत आणि उर्वरित भाग शेअर बाजाराशी निगडीत मुच्युअल फंडांच्या युनिटमध्ये गुंतविण्यात येतो. 

इर्डाने युलिप्समधील विम्याचे प्रमाण वाढविण्याचा निर्णय घेतला आहे. तसेच गुंतवणूकदारांनी सदर योजना मुदतपूर्व बंद करू नये यासाठी युलिप्सच्या नियमात बदल करण्यात येणार आहे. गुंतवणूकदारांचे प्रबोधन केल्याशिवाय ते ही योजना मुदतपूर्व बंद करणार नाहीत, तसेच त्यासाठी विमा सल्लागारांनी अधिक कडकपणे वागणे आवश्यक आहे, असे मत व्यक्त करण्यात येत आहे. 

राइट होरायझन्सचे सीईओ अनिल रेगो यांच्या मते, ग्राहकांना युलिप्सची योग्य माहिती देणे आवश्यक आहे. 

काही तज्ज्ञांच्या मते विमा एजंट गुंतवणूकदारांना तीन वर्षांनंतर प्रीमियम देऊ नका, त्यानंतर तुम्हाला उत्पन्न मिळत जाईल, असे सांगून त्यांची दिशाभूल करीत असतात. त्यासाठी हे एजंट शेअर बाजारातील तेजीचे उदाहरण देतात. परिणामी ज्या गुंतवणूकदारांना केवळ विमा योजनेत मिळणाऱ्या उत्पन्नावर समाधान नसते, ते अधिक उत्पन्नाच्या अपेक्षेने युलिप्स योजनेकडे वळतात आणि एजंटच्या सल्ल्यानुसार तीन वर्षांनी या योजनेतून बाहेर पडण्याचा प्रयत्न करतात. यासाठी गुंतवणूकदारांना योग्य प्रशिक्षणाची गरज आहे.

Source :- http://maharashtratimes.indiatimes.com/articleshow/6080277.cms